Komisioni për Financim dhe Buxhet nisi pasditen e sotme debatin për amendamentet e paraqitura ndaj Propozim-Buxhetit për vitin 2026. Sipas zëvendëskryetares së Komisionit, Jovanka Trençevska, janë dorëzuar gjithsej 203 amendamente nga propozues të autorizuar.
Në fillim të seancës, u refuzuan tre amendamente të propozuara nga deputetët e grupit parlamentar të BDI-së. Këto amendamente kërkonin rritje të mjeteve për punësimin e përfaqësuesve nga komunitetet jo-shumicë në Kabinetin e Kryetarit të Kuvendit dhe në Komisionin për Parandalimin dhe Mbrojtjen nga Diskriminimi, si edhe për mbulimin e shpenzimeve operative të Komisionit. Propozimet nuk u mbështetën nga përfaqësuesi i Qeverisë, zëvendësministri i Financave Nikollçe Jankullovski, dhe nuk u votuan nga Komisioni.
Deputetët e LSDM-së propozuan me amendament një rritje prej 14 milionë denarësh për Agjencinë Teknike Operative (ATO), për punësimin e stafit shtesë. Deputeti Oliver Spasovski theksoi se mungesa e kuadrit mund të kufizojë funksionimin e ATO-së, duke u mbështetur edhe në rekomandimet e Raportit të Komisionit Evropian.
Zëvendësministri Jankullovski njoftoi se, pas konsultimeve, Qeveria është e gatshme të pranojë pjesërisht amendamentin, duke rritur buxhetin për punësim në ATO me pesë milionë denarë, propozim që u pranua nga deputetët e LSDM-së. Megjithatë, një amendament tjetër i tyre për shtesë fondesh për infrastrukturën e ATO-së nuk u pranua.
Përmes një tjetër amendamenti, deputetët e LSDM-së kërkuan që 300 milionë denarë të parashikuar për subvencione sportive të rialokohen për nxitjen e investimeve të huaja direkte dhe zhvillimin e zonave industriale. Propozimi nuk u pranua, ndërsa zëvendësministri Jankullovski deklaroi se fondet për investime të huaja janë rritur me një miliard denarë krahasuar me buxhetin e vitit 2025.
