Reperi amerikan Eminem ka ngritur një padi ndaj një kompanie australiane të veshjeve të quajtur Swim Shady, duke pretenduar se emri i saj është shumë i ngjashëm me pseudonimin e tij të mbrojtur me markë tregtare, Slim Shady.
Sipas BBC-së, në muajin shtator, Eminem, emri i vërtetë i të cilit është Marshall B. Mathers III, paraqiti një kërkesë zyrtare në Zyrën e Patentave dhe Markave Tregtare të Shteteve të Bashkuara, duke kërkuar anulimin e markës tregtare të miratuar për kompaninë Swim Shady.
Ligjet amerikane parashikojnë që kompania duhet t’i përgjigjet kërkesës deri javën e ardhshme. Avokatët e reperit 53-vjeçar kanë akuzuar kompaninë me seli në Sydney për krijimin e një marke që bie ndesh me të drejtat e autorit të klientit të tyre.
Menaxhmenti i Swim Shady deklaroi për BBC-në se do të “mbrojnë pronën e tyre të vlefshme”.
Kompania Swim Shady u regjistrua në shtator 2023 pranë rregullatorit australian të biznesit dhe fillimisht u njoh me emrin Slim Shade. Marka u lançua zyrtarisht në vitin 2024 dhe ofron produkte si çadra, çanta dhe pajisje plazhi.
Në fillim të këtij viti, Swim Shady paraqiti kërkesë për regjistrimin e emrit si markë tregtare edhe në SHBA, kërkesë që u miratua. Pak kohë më pas, ekipi ligjor i Eminem-it paraqiti një mocion për të anuluar këtë miratim.
Reperi ka dorëzuar gjithashtu një ankesë zyrtare për këtë çështje edhe në Australi. Dokumentet gjyqësore tregojnë se Eminem e regjistroi emrin Slim Shady si markë tregtare në SHBA që në vitin 1999, kur publikoi albumin me të njëjtin titull.
