Kuvendi ka miratuar ndryshimet në Ligjin për Tatimin mbi Vlerën e Shtuar, duke shfuqizuar përjashtimin nga TVSH-ja për dërgesat online me vlerë deri në 22 euro.
Sipas Ministrisë së Financave, qëllimi i ndryshimeve është përforcimi i ekonomisë vendore, mbështetja e bizneseve vendase dhe krijimi i vendeve të reja të punës.
“Zbatimi i këtyre ndryshimeve pritet të sjellë efekte pozitive në ekonominë dhe punën e kompanive vendore. Me shfuqizimin e lirimit nga TVSH-ja, rreth 4 milionë denarë në muaj do të ridrejtohen drejt ekonomisë vendore – sa është qarkullimi në platformat e huaja në periudha të caktuara. Këto mjete do të ndihmojnë në rritjen e kompanive lokale, krijimin e vendeve të reja të punës, përmirësimin e kushteve dhe rritjen e pagave”, thuhet në njoftim.
Ministria shton se ndryshimet përfaqësojnë një hap të rëndësishëm në zhvillimin e ekonomisë vendore, veçanërisht në një periudhë globalizimi dhe rritjeje të tregtisë digjitale. Po ashtu, ligji i ri pritet të ndikojë në uljen e ekonomisë informale.
“Modeli i mëparshëm lejonte abuzime të mundshme, përmes importimit të mallrave të liruara nga TVSH-ja dhe shitjen e tyre në tregun vendas. Ndryshimet aktuale synojnë parandalimin e këtyre praktikave, duke krijuar një mjedis të drejtë dhe të kontrolluar tregu”, thuhet më tej.
Sipas Ministrisë, kostoja e përllogaritjes dhe pagesës së TVSH-së nuk do të bjerë mbi qytetarët, prandaj nuk pritet ndryshim në çmimet për konsumatorët fundorë. Kjo masë synon të sigurojë konkurrencë të drejtë mes platformave online vendase dhe të huaja. “Me këtë vendim, shteti dërgon një mesazh të qartë mbështetjeje për kompanitë që krijojnë vlerë të shtuar në vend,” theksoi Ministria e Financave.
