Presidenti ukrainas, Volodymyr Zelensky, ndodhet në Ankara për një takim me presidentin turk, Recep Tayyip Erdogan. Pas takimit, ai pritet të dalë në konferencë për media.
Zelensky nuk është i vetëm në këtë vizitë. Si zakonisht, pjesë e delegacionit është edhe Andriy Yermak, shefi i stafit të presidentit ukrainas, që e mban këtë post prej pesë vitesh.
Ndërkohë, brenda qeverisë së Ukrainës janë shtuar tensionet, pasi presidenti po përballet me një skandal korrupsioni. Mediat ndërkombëtare raportojnë, duke cituar zyrtarë të lartë ukrainas dhe burime nga partia në pushtet, se ka presion në rritje ndaj Zelenskyt për të larguar Yermak nga posti.
Disa burime kanë sugjeruar se ai mund të shkarkohet që sot, megjithëse nuk ka ende prova konkrete për një vendim të tillë.
Kundërshtarët e Yermak e kanë lidhur atë me skandalin e korrupsionit – akuza që ai i ka mohuar. Ata gjithashtu e fajësojnë për rolin e tij në përpjekjet e dështuara të Zelenskyt për të kufizuar pavarësinë e autoritetit kombëtar kundër korrupsionit.
Raportet theksojnë se pakënaqësia ndaj Yermak buron edhe nga ndikimi i tij i madh në vendimmarrje dhe mbikëqyrje në Kiev, megjithëse ai nuk është zyrtar i zgjedhur.
Pavarësisht kritikave, Yermak deklaroi në kanalin e tij Telegram se kishte mbërritur në Turqi dhe ishte në kontakt të vazhdueshëm me Shtetet e Bashkuara për çështje që lidhen me paqen.
Ndërkohë, Parlamenti i Ukrainës ka miratuar dorëheqjet e ministrit të drejtësisë German Galushchenko dhe ministres së energjisë Svitlana Hrynchuk, të cilët u tërhoqën nga detyra pas një hetimi të madh për korrupsion.
Të dy kishin paraqitur dorëheqjet një javë më parë, pas nxitjes nga presidenti Zelensky. Galushchenko është nën hetim nga Byroja Kombëtare Kundër Korrupsionit, me rastin që lidhet me sektorin e energjisë. Ai kishte shërbyer si ministër i energjisë nga viti 2021 deri në vitin 2025, ndërsa Hrynchuk mori detyrën këtë verë.
Të dy ish-ministrat kanë mohuar çdo përfshirje në shkelje ligjore.
