Autoritetet turke nuk lejuan hyrjen në portin e Stambollit për anijen turistike Astoria Grande, e cila mblodhi rreth 600 pasagjerë rusë. Anija qëndroi disa orë në ujërat pranë Stambollit, duke pritur vendimin e autoriteteve.
Pas periudhe të gjatë pasigurie, kapiteni vendosi të kthehej drejt portit të Socchit, duke anuluar itinerarin e planifikuar. Turistët kishin blerë një udhëtim dyjavor që përfshinte ndalesa në Marmaris, Antalya, Bodrum dhe Izmir, ndërsa Stambolli konsiderohej pika kryesore e ekskursionit.
Sipas mediave ruse, atmosfera në bord ishte e tensionuar: pasagjerët kërkonin informacion, stafi përpiqej të qetësonte situatën, ndërsa kompania e lundrimit nuk dha shpjegime të menjëhershme.
Ngjarja vjen pak ditë pasi autoritetet ruse në rajonin Krasnodar penguan hyrjen e tragetit turk Seabridge në portin e Socchit dhe e kthyen mbrapsht. Disa media ruse po paraqesin rastin e Astoria Grande si një veprim të mundshëm ‘hakmarrjeje’ nga ana e Turqisë. Asnjë nga palët nuk ka dhënë një deklaratë zyrtare që shpjegon vendimin.
Në përfundim, pasagjerët u gjendën përballë anulimit të ndalesës më të pritur të udhëtimit, ndërsa një udhëtim i shitur si pushime mesdhetare u kthye në një lundrim të gjatë pa arritur destinacionin kryesor.
/Telegrafi/
