Suksesi nuk është më vetëm titulli i lartë, zyra me pamje panoramike apo paga me shumë zero. Gjithnjë e më shumë gra po zgjedhin rrugën e tyre: lirinë e vendimmarrjes dhe paqen në përditshmëri.
Shpesh kemi dëgjuar frazën “mund t’i kesh të gjitha” — një karrierë mbresëlënëse, një shtëpi e rregulluar, prindërim i përkushtuar, pamje e përsosur dhe jetë sociale aktive. Ky narrativ u është servuar grave që kur hyjnë në tregun e punës, ku suksesi matet me metrika klasike: ngjitje në hierarki, kostum, takë dhe një titull që tingëllon mirë.
Megjithatë, koncepti tradicional i suksesit nuk është i vetmi. Ambiciet nuk duhet të përkthehen domosdoshmërisht në ngritje të vazhdueshme në struktura korporative, paga më të mëdha apo pronësi materiale. Shumë gra që arritën këto gjëra ndjenë nevojën për të dalë nga ky rreth i mbyllur, ndërsa të tjerat brenda kompanive riformësuan ambiciet e tyre dhe ndryshuan rutinën e përditshme.
Çfarë është vërtet ambicia? Ekuilibër — midis punës dhe gjithçkaje tjetër. Në diskutimet e biznesit flitet për “balancën punë-jetë”, por kjo përkufizon keq situatën sepse nënkupton një peshore me punën në njërën anë dhe jetën në tjetrën. Në realitet, pesha ka shumë dimensione: shëndetin fizik dhe mendor, detyrimet familjare, marrëdhëniet, udhëtimet dhe hobet. Të gjitha këto duhet të jenë në harmoni; kur i japim përparësi vetëm punës, rrezikojmë djegien emocionale.
Pandemia dhe ndryshimet pas saj reflektojnë një tjetër tranzicion: para saj, prania në zyrë ishte norma. Kur punonjësit vunë re se mund të punojnë larg zyrës, nisën të kërkonin edhe fleksibilitet në kohë dhe mbështetje nga punëdhënësit. Disa kompani u përshtatën për të mbijetuar, ndërsa të tjerat përballën me sfida si kriza reputacioni, padi dhe rënie të vlerës së aksioneve.
Si rezultat, shumë punonjës përfituan nga ndryshimet në mënyrën e punës, ndërsa të tjerë iu drejtuan formave më të lira të punës: sipërmarrje, freelance ose biznese personale. Zgjedhja e karrierës mori më shumë nuanca dhe mundësi.
Paqja është bërë për shumë njerëz ambicia kryesore. Përballë pasigurisë, frikës dhe konfuzionit të viteve të fundit, dëshira për një ambient të qetë dhe të kontrollueshëm është rritur. Shumë preferojnë një jetë më të thjeshtë dhe të qëndrueshme përditshmërie mbi titujt dhe luksin e jashtëm.
Ngjitja në shkallët korporative mbetet një ambicie e admirueshme, por sot ekzistojnë edhe rrugë të tjera për të ndërtuar një karrierë të suksesshme: pronare të brendeve të vogla, edukatore, trajnerë dhe profesioniste të pavarura. Zgjedhja ekziston; ajo kërkon reflektim, mbështetje komunitare dhe besim në aftësitë personale.
/Telegrafi/
