Gjykatësi i procedurës paraprake i Gjykatës Themelore në Koçan ka caktuar masën e arrestit shtëpiak për dy kontrollorë tatimorë të DAP-it në Shtip, të përfshirë në hetimin lidhur me klubin ‘Pulse’. Për gjashtë të dyshuar të tjerë janë shqiptuar masa kujdesi, ndërsa një person ka marrë kufizime shtesë.
Sipas Prokurorisë, kontrollorët dyshohen se kanë keqpërdorur pozitën zyrtare duke zbuluar informacione për kontrolle të paparalajmëruara, për çka dyshohen për marrje ryshfeti. Personi përgjegjës nga ‘Pulse’ ngarkohet për dhënie ryshfeti.
Hetimi po vijon edhe ndaj shtatë inspektorëve tatimorë nga Shtipi dhe Strumica, të cilët dyshohen se kanë mundësuar që objektet ‘Pulse’ dhe ‘MMMM Café’ të shmangnin kontrollin fiskal. Pronari i ‘Pulse’, i cili ndodhet në paraburgim, dyshohet edhe për falsifikim dokumentesh, ndërsa një inspektore e Inspektoratit të Tregut akuzohet për dhënie të sekretit zyrtar, bëri të ditur TV21.
Prokuroria Themelore Publike në Koçan ka pranuar vendimin për caktimin e masës së arrestit shtëpiak për dy të dyshuarit dhe njofton se do të paraqesë ankesë për këtë vendim.
