Administrata civile e Izraelit njoftoi se synon të marrë pjesë të mëdha të Sebastisë, një sit arkeologjik në Bregun Perëndimor, sipas një urdhri qeveritar të publikuar më 12 nëntor.
Organizata Peace Now, e cila monitoron vendbanimet, tha se pjesa që synohet përfshin rreth 450 ari, dhe e përshkroi këtë si marrjen më të madhe të tokës me rëndësi arkeologjike nga ana e Izraelit. Peace Now i dha dokumentin agjencisë AP.
Urdhri rendit parcelat e tokës që synohen për konfiskim dhe u jep palestinezëve 14 ditë kohë për të paraqitur ankesë kundër këtij vendimi. Sipas Peace Now, siti arkeologjik, ku rriten mijëra ullinj, i përket palestinezëve.
Izraeli njoftoi në vitin 2023 planet për ta kthyer atë zonë në një atraksion turistik. Gërmimet kanë filluar dhe qeveria ka ndarë më shumë se 9,24 milionë dollarë për zhvillimin e vendbanimit, sipas Peace Now dhe një organizate tjetër për të drejtat e njeriut.
Lëvizja për konfiskim vjen ndërsa kolonët izraelitë ngritën gjatë natës një vendbanim të ri të paautorizuar pranë Betlehemit. Një avokat palestinez tha se një aktivist nga Bregu Perëndimor u arrestua dhe u shtrua në spital.
Human Rights Watch deklaroi se Izraeli mund të ketë kryer krime lufte kur këtë vit dëboi me forcë 32,000 palestinezë nga tre kampe refugjatësh në Bregun Perëndimor. Sipas Peace Now, më herët konfiskimi më i madh i tokës historike nga Izraeli ishte 70 ari në Susya.
/Telegrafi/
