Vendimet e fundit të Kuvendit të Kosovës datojnë gati një vit më parë, ndërsa legjislatura e shpërndarë nuk do të zëvendësohet shpejt. Me zgjedhjet e 28 dhjetorit, legjislatura e re mund të konstituohet vetëm pas disa muajsh, çka nënkupton se vendi do të hyjë në një periudhë mbi një vit pa vendimmarrje në institucionin më të lartë.
Sipas materialit të publikuar, legjislatura e nëntë e Kuvendit, të cilën e shpërndau presidentja të enjten, nuk ka miratuar as ligje, as emërime të anëtarëve të bordeve, dhe nuk ka zhvilluar mbikëqyrje apo trajtuar çështje të reja.
Edhe pse nuk kanë kryer punë, ish-ligjvënësit po marrin pagë që nga prilli, kur u betuan. Një pjesë e tyre do të vazhdojnë të marrin të ardhura edhe nga e drejta për kompensim kalimtar.
Paraprakisht, edhe pse ligjërisht mandati ishte deri në mars 2025, legjislatura e tetë kishte ndalur punën në dhjetor 2024, dy muaj para zgjedhjeve parlamentare të 9 shkurtit. Në këtë periudhë nuk u votuan marrëveshjet ndërkombëtare, përfshirë marrëveshjen me Bashkimin Evropian për Planin e Rritjes, nga i cili Kosova mund të përfitonte deri në 882 milionë euro.
Në rrethanat aktuale, shqetësuese është fakti se Kuvendi do të mbetet pa vendimmarrje për së paku disa muaj — deri pas konstituimit të legjislaturës së dhjetë, që do të dalë nga zgjedhjet e 28 dhjetorit.
Naim Jakaj, hulumtues i lartë në Institutin për Kosovën për Drejtësi (IKD), vlerëson se pasojat e këtij viti mund të jenë të pariparueshme. Siç tha ai: “Ky vit tashmë është i humbur për Kosovën dhe pasojat në disa rrafshe do të mund të jenë të pariparueshme. Për arsye se kemi një vit ku nuk dihet nëse do të kemi buxhet në dy-tre muajt e parë, shkojmë pa marrëveshjet nga Plani i Rritjes, shkojmë pa buxhetin për RTK-në, pa buxhetin për katër komunat që tashmë do duhej të ekzekutoheshin ato buxhete të vitit 2025.”
Po ashtu, mungesa e Kuvendit pritet të ndikojë në funksionimin e bordeve, që rezultojnë jofunksionale në 17 agjenci sipas IKD-së, si dhe në emërimin e anëtarëve të Gjykatës Kushtetuese. Jakaj vëren se Gjykata është aktualisht në minimum të kuorumit: “Paramendojeni situatën sikur një gjyqtar të dorëhiqet… atëherë Gjykata mbetet pa kuorum dhe nuk mund të trajtojë lëndë ose të ketë proces të vendimmarrjes.”
Vendimet e fundit të Kuvendit datojnë nga fillimi i dhjetorit 2024 dhe shumica prej tyre janë ende të kontestuara në Gjykatën Kushtetuese. Monitoruesit e punës së Kuvendit vlerësuan edhe vitin 2024 si të dobët: matjet e Institutit Demokratik të Kosovës tregojnë se rreth 35% e seancave u ndërprenë dhe rezultuan me vazhdime për shkak të mungesës së kuorumit.
Burim: Tv Dukagjini
