Ish-deputeti Arben Gashi ka ndarë përvojat e tij nga procesi i formimit të Ushtrisë së Kosovës, duke përshkruar sfidat dhe presionet që përballi LDK-ja gjatë asaj periudhe. Ai përmendi gjithashtu se së fundi iu bashkua përgëzimit të ish-kryeministrit Isa Mustafa ndaj Ramush Haradinajt për formimin e ushtrisë me ligj.
Gashi tregon për takimin e parë, që u mbajt në rezidencën e një ambasadori të QUINT-it. Nga LDK-ja ishin të pranishëm Isa Mustafa, Ismet Beqiri, vetë Gashi si kryetar i Komisionit për Legjislacion, dhe Edon Myftari për përkthim. Siç rrëfen ai, kur i kërkuan mendimin deklaroi qartë: “Jam kundër. Do të votoj kundër. Dhe do t’i lus edhe të tjerët të votojnë kundër.” Pas takimit, LDK-ja vendosi që nuk do të përkrahte ndryshimin kushtetues.
Në takimin e dytë ishin prezent ambasadorët e QUINT-it, përfaqësues të BE-së dhe përfaqësuesit e të gjitha partive shqiptare, përveç VV-së. Nga LDK-ja morën pjesë Gashi, Ismet Beqiri dhe Vjosa Osmani. Atmosfera, thotë ai, ishte më e rëndë dhe debati më i ashpër — jo vetëm me ndërkombëtarët, por edhe mes vetë partive shqiptare. Megjithatë, vendimi i LDK-së nuk ndryshoi.
Gashi tregon gjithashtu për një propozim të bërë në mënyrë personale nga një ambasador, i cili erdhi në zyrën e tij në Kuvend dhe i ofroi një “zgjidhje praktike”: LDK-ja të pranonte kthimin e vendeve të rezervuara, në këmbim të sigurimit të votave të deputetëve serbë për ndryshimet kushtetuese që do të lejonin formimin e ushtrisë. Ai thotë se e refuzoi menjëherë pa asnjë dilemë.
Sipas Gashit, LDK-ja vendosi që Ushtria e Kosovës të formohej me ligj dhe pa kompromis kushtetues që mund të rrezikonte stabilitetin e shtetit. Ai vlerëson se pretendimet se LDK-ja “paska kundërshtuar ushtrinë” ishin të padrejta, sepse ushtria u formua ashtu siç e mbrojtën ata: me ligj dhe pa kompromis kushtetues që dëmtonte vendin.
Gashi thekson se sot Ushtria e Kosovës po rritet dhe po profesionalizohet çdo ditë. “Kosova ka ushtrinë që e ka merituar — pa pazar politik dhe pa cenuar stabilitetin e saj kushtetues,” përfundon ai.
Burimi: Telegrafi
