Reperi Pras Michel, anëtar i grupit The Fugees dhe fitues i çmimit Grammy, është dënuar me 14 vjet burg për përfshirjen në një skemë financiare që përdori miliona dollarë donacione të huaja për fushatën e rizgjedhjes së Barack Obamës në vitin 2012.
Michel u shpall fajtor në prill 2023 për dhjetë akuza, përfshirë veprim si agjent i paregjistruar i një qeverie të huaj dhe komplot për devijim të fondeve. Prokuroria thotë se shumica e këtyre fondeve u siguruan nga biznesmeni malajzian Jho Low.
Departamenti i Drejtësisë kërkoi dënimin maksimal, duke e quajtur Michel “tradhtar të vendit të tij”, ndërsa mbrojtja argumentoi se dënimi ishte “i lartë”.
Kërkesa për një gjyq të ri, në të cilën avokati pretendoi përdorim të inteligjencës artificiale, u refuzua.
Përveç akuzave për devijim të fondeve, Michel u akuzua edhe për përpjekje për të manipuluar dëshmitarë dhe për pengim të hetimeve të Departamentit të Drejtësisë lidhur me Jho Low. Prokurorët përshkruan veprimet e tij si të qëllimshme dhe të nxitura nga përfitime personale.
Rasti konsiderohet një nga më të rëndësishmit në historinë e hetimeve për financimin e fushatave elektorale në ShBA dhe tregon pasojat serioze të shkeljeve të ligjeve që ndalojnë donacionet e huaja në politikë.
Telegrafi
