Në Gjykatën Themelore në Prishtinë, në gjykimin ndaj Naim Murselit, Kushtrim Kokallës dhe Granit Plavës, të hënën mungoi dëshmitari Shaban Murseli — babai i të akuzuarit Naim. Gjykata vendosi që të lexohet deklarata e tij e dhënë në polici.
Të akuzuar në këtë rast, për vrasjen e Liridona Ademajt më 29 nëntor 2023, janë Naim Murseli, Granit Plava, Kushtrim Kokalla dhe Tom Dodaj, sipas raportimit të “Betimi për Drejtësi”.
Gjykatëse Fatime Dermaku njoftoi se për Shaban Murselin është lëshuar urdhëresë për verifikim adrese dhe dorëzim ftese, ndërsa sipas nipit të tij ai jeton në Suedi. Gjykata mori gjithashtu informacionin se Murseli ka njoftuar që nuk mund të jetë i pranishëm në seancë.
Prokurorja Javorka Perlinçeviq propozoi që deklarata e dhënë në procedurën paraprake më 6 dhjetor 2023 të lexohet si provë, me arsyetimin se dëshmitari nuk është i qasshëm për organet e drejtësisë dhe për të kursyer kohën e procedurës.
Avokati i palës së dëmtuar, Leotrim Syla, dhe mbrojtësja e Naim Murselit, Teuta Zhinipotoku, përkrahën propozin e prokurorisë. Vetë i akuzuari Murseli dhe i akuzuari Granit Plava, si dhe avokati i tij Skender Gojani, u pajtuan që deklarata të lexohet. Avokati i Kushtrim Kokallës, Ndrecë Doda, dhe i akuzuari Kokalla thanë se pajtohen që deklarata të mbahet vetëm si shkresë, jo si provë.
Trupi gjykues vendosi që të lexohet deklarata e dëshmitarit Shaban Murseli e dhënë në polici më 6 dhjetor 2023.
Raporti i Institutit të Psikiatrisë Forenzike të Kosovës konstatoi se Naim Murseli nuk ka pasur çrregullime apo sëmundje mendore në kohën e kryerjes së veprës penale. Po ashtu, në seancën e 22 shtatorit 2025 ekspertët Shpend Haxhibeqiri dhe Bujar Obërtinca konstatuan se të akuzuarit Murseli dhe Plava nuk kanë çrregullime mendore.
Në seancën fillestare të mbajtur më 31 janar 2025, Naim Murseli u deklarua i pafajshëm. Granit Plava nuk dha deklarim rreth fajësisë, ndërsa Kushtrim Kokalla tha se nuk deklarohet pa u konsultuar me mbrojtjen. I akuzuari Tom Dodaj pranoi fajësinë dhe u dënua me pesë vjet burg dhe 5,000 euro gjobë.
Prokuroria Themelore në Prishtinë më 15 janar 2025 ngriti aktakuzë ndaj Naim Murselit, Granit Plavës, Kushtrim Kokallës dhe Tom Dodajt. Sipas aktakuzës, Murseli, Plava dhe Kokalla ishin dakorduar që vrasja të kryhej nga Plava, me marrëveshje që Murseli t’i paguante atij 30,000 euro. Aktakuzën përshkruan gjithashtu se plani ishte nisur nga Murseli për shkak të problemeve familjare dhe dëshirës për hakmarrje, se më pas Plava u përfshi pas kontakteve me Kokallën, dhe se arma me 20 fishekë, me të cilën u krye vrasja, ishte siguruar nga Tom Dodaj për 280 euro.
