Nkosazana Zuma-Mncube ka paraqitur një padi penale kundër motrës së saj, deputetes Duduzile Zuma-Sambudla, duke e akuzuar për rekrutimin e 17 burrave që të luftonin për mercenarët rusë.
Sipas deklaratës së Zuma-Mncube, Duduzile Zuma-Sambudla dhe dy persona të tjerë mashtruan këta burra, duke u thënë se po udhëtonin drejt Rusisë për t’u trajnuar si truproja për partinë Mkhonto Wesizwe (MK).
Policia njofton se po heton rastin. Duduzile Zuma-Sambudla, 43 vjeç, nuk i është përgjigjur kërkesës së BBC-së për koment.
Qeveria e Afrikës së Jugut kishte njoftuar më parë se kishte marrë thirrje alarmi nga 17 qytetarë që u bashkuan me forcat mercenare në konfliktin Rusi–Ukrainë. Burrat, të moshave 20 deri 39 vjeç, u joshën me premtime për kontrata fitimprurëse.
Analistët vënë në dukje se Afrika e Jugut ka një shkallë papunësie mbi 30%, ndërsa papunësia tek të rinjtë është më e lartë, çka i bën ata më të prekshëm ndaj rekrutimit.
Zuma-Mncube tha se kishte detyrë morale të paraqiste padinë në polici. Më parë këtë javë, media financiare Bloomberg raportoi akuza të ngjashme dhe se disa persona ishin rekrutuar edhe nga Botswana fqinje.
Akuzat shtohen mbi problemet ligjore në të cilat ndodhet Duduzile Zuma-Sambudla: ajo po ndiqet penalisht për komente në mediat sociale katër vjet më parë, gjatë protestave vdekjeprurëse pas arrestimit të babait të saj. Lëvizjet e dhunshme të korrikut 2021, që përfshinë plaçkitje dhe zjarrvënie, lanë të paktën 300 të vdekur. Deputetja është akuzuar për nxitje të këtyre trazirave, ndërsa ajo thotë se akuzat janë të motivuara politikisht.
Jacob Zuma u dënua me burg për shpërfillje të gjykatës pasi refuzoi të merrte pjesë në një hetim mbi akuza për korrupsion që çuan në shkarkimin e tij. Më pas ai themeloi partinë MK dhe e udhëhoqi atë drejt vendit të tretë në zgjedhjet e vitit të kaluar.
Raport: Telegrafi.
