Pajisja e fundit në linjën Galaxy A7x nga Samsung ishte A73, e lançuar në vitin 2022. Pas kësaj, seria A7x nuk ka pasur modele të reja, por tani duket se kompania po përgatitet të rikthejë këtë segment me modelin Galaxy A77.
Një prototip i A77 është vërejtur në bazën e të dhënave të Geekbench, ku shfaqej me 8 GB RAM, Android 16 dhe një çipset që lidhet me familjen Exynos 2400/2400e të Samsung. Sidoqoftë, bazuar në konfigurimin e frekuencave të CPU-së, ky çip duket se punon me frekuenca më të ulëta se Exynos 2400 dhe 2400e që njihen më parë.
Konfigurimi i CPU-së i listuar në Geekbench tregon tre bërthama “Prime” të akorduara deri në 2.78 GHz, tri bërthama “performance” deri në 2.3 GHz dhe katër bërthama efikasiteti deri në 1.82 GHz. Kjo nënkupton se SoC ka gjithsej dhjetë bërthama, si Exynos 2400 dhe 2400e, por me frekuenca operative më të ulëta.
Këto karakteristika i përshtaten më shumë një pajisjeje të nivelit të lartë-mesëm sesa një flagship-i. Është e mundur që të bëhet fjalë për variantet më pak të fuqishme të familjes Exynos 2400 që Samsung mund t’i përdorë në këtë model.
Asnjë specifikacion tjetër i Galaxy A77 nuk është zbuluar deri tani. Nëse A77 do të lançohet së bashku me A57 (i cili po ashtu u shfaq në Geekbench më herët), ajo mund të dalë në treg rreth marsit. (Burimi: Telegrafi)
