Ambasada e Zvicrës në Kosovë ka përshëndetur ndeshjen emocionuese mes përfaqësueseve të Zvicrës dhe Kosovës, si dhe atmosferën miqësore që e karakterizoi takimin.
Përmes një postimi në rrjetet sociale, ambasada uroi të dyja skuadrat për përpjekjen dhe bashkëpunimin në fushë, duke e cilësuar takimin si një “lojë të shkëlqyer”.
Zvicra ka siguruar kualifikimin për Kampionatin Botëror 2026, ndërsa Kosova ka kaluar në fazën play-off, duke ruajtur mundësinë për të marrë pjesë në këtë garë.
“Jemi shumë të lumtur që Zvicra është kualifikuar për Kupën e Botës dhe që Kosova ka kaluar në fazën eliminatore – po brohorasim me zë të lartë nga Prishtina”, thuhet në reagimin e ambasadës.
Ndeshja, e zhvilluar në stadiumin “Fadil Vokrri” në Prishtinë, përfundoi me rezultat të barabartë 1:1. Të dy golat u shënuan gjatë pjesës së dytë.
