Ariana Grande u shfaq e shkëlqyer në Çmimet e 16-ta të Guvernatorëve në Los Angeles, duke bërë paraqitjen e saj të parë publike pas incidentit në Singapor. Këngëtarja 32-vjeçare mahniti me një fustan delikat Dior rozë të zbehtë, vintage, nga koleksioni pranverë-verë 2007, me detaje të punuara me rruaza. Flokët i kishte të kapura në një stil elegant me ndarje anësore.
Ky rikthim vjen pas një incidenti ku një fans, i quajtur Johnson Wen, u hodh drejt saj në tapetin e kuq të premierës së ‘Wicked: For Good’ në Singapor. Ai u arrestua dhe u akuzua për prishje të qetësisë publike. Ariana nuk e përmendi këtë incident në postimin e saj falënderues për Singaporin.
Në eventin e Los Angeles-it, Akademia nderoi Debbie Allen, Tom Cruise dhe Wynn Thomas me Çmimin Nderi të Akademisë, ndërsa Dolly Parton mori Çmimin Humanitar Jean Hersholt. Ceremonia mblodhi yje të shumtë të Hollywood-it në një mbrëmje emocionuese.
