Alejandro Grimaldo është rikthyer në qendër të vëmendjes gjatë afatit kalimtar të transferimeve. Mbrojtësi i majtë spanjoll po zhvillon një sezon të shkëlqyer me Bayer Leverkusenin dhe ka tërhequr interesimin e disa klubeve të mëdha evropiane, veçanërisht Barcelonës dhe Bayern Munichut.
Sipas gazetarit Matteo Moretto, drejtuesit e Barcelonës janë duke ndjekur nga afër paraqitjet e Grimaldos. Situata fizike dhe sportive e Alejandro Baldés ka ngritur shqetësime në kampin katalanas, dhe klubi po shqyrton mundësinë e përforcimit të krahut të majtë me një lojtar me përvojë.
Në këtë kontekst, emri i Grimaldos ka fituar peshë, sidomos duke pasur parasysh dëshirën e futbollistit për t’u rikthyer në Spanjë në të ardhmen.
Marrëdhëniet mes Grimaldos dhe Bayer Leverkusenit konsiderohen të shkëlqyera, çka mund të lehtësojë një transferim të mundshëm në La Liga nëse lojtari kërkon të largohet.
Klubi gjerman është i gatshëm të mos e pengojë një kalim të tij drejt Spanjës, nëse lojtari shpreh qartë dëshirën për një largim. Kjo situatë i jep Barcelonës një avantazh të mundshëm, ndonëse nuk është ndërmarrë ende një hap konkret.
Nga ana tjetër, Bayern Munich vazhdon të jetë aktiv në këtë garë. Klubi bavarez ka disa javë që shqyrton alternativa për të forcuar prapavijën dhe Grimaldo shihet si një përforcim i përshtatshëm për projektin e tyre.
Sipas raportimeve nga Gjermania, Bayern është i gatshëm të ofrojë deri në 30 milionë euro për kartonin e lojtarit, një shumë që Bayer Leverkusen e konsideron të arsyeshme për të nisur negociatat.
