Bekim Salihu, analist i politikave në Institutin GAP, ka reaguar ndaj thirrjes për mbledhje nga Kryetari i Prishtinës, duke e cilësuar atë si të paligjshme.
Sipas Salihut, me certifikimin e asambleistëve të rinj nga Komisioni Qendror i Zgjedhjeve (KQZ), mandati i përbërjes së mëparshme të Kuvendit Komunal përfundon automatikisht. “Nga ky moment, vetëm asambleistët e rinj gëzojnë legjitimitet dhe të drejtë për të marrë vendime”, theksoi ai.
Salihu shtoi se hapi i radhës duhet të jetë organizimi i seancës konstituive, e cila, sipas ligjit, duhet të thirret brenda 15 ditëve nga certifikimi i asambleistëve të rinj. Ai vuri në dukje se çdo tentim për mbledhje me përbërjen e kaluar është pa efekt juridik.
“Megjithatë, duket se ka një konsensus të gjerë nacional që praktikat jo të rregullta dhe të pa bazuara në norma ligjore nuk duhet të ndikojnë në kalimin e vendimeve”, tha Salihu.
Reagimi i tij vjen në një kohë kur qyteti i Prishtinës po përballet me sfida në organizimin e organeve të reja komunale pas zgjedhjeve lokale.
Burimi: Telegrafi.
