Reshjet e dendura të dëborës në Mbretërinë e Bashkuar shkaktuan mbylljen e qindra shkollave, ndërprerje të fluturimeve, ndërprerje të furnizimit me energji dhe bllokime në disa rrugë.
Sipas mediave britanike, të përcjella nga Telegrafi, rreth 100 shkolla në Skocinë veriore, 57 në Uells dhe 41 në Yorkshire u detyruan të mbyllin dyert sot.
Në Yorkshire të Veriut shoferët u detyruan të braktisin automjetet dhe të vazhdonin në këmbë pasi bora e dendur bëri rrugët të pasigurta. Autoritetet u këshilluan qytetarëve që të kryejnë vetëm udhëtimet e domosdoshme, ndërsa reshjet penguan edhe mbledhjen e mbeturinave.
Disa pjesë të Anglisë verilindore janë vendosur nën paralajmërim të verdhë për borë, ndërsa Zyra Meteorologjike paralajmëroi se zona të tjera nën paralajmërim qelibërt mund të përballen me kushte stuhie dëbore. Reshjet e borës dhe të shiut vazhduan gjatë natës deri të enjten, dhe zonat më të prekura pritet të përjetojnë ndërprerje të udhëtimeve dhe prishje të mundshme të furnizimit me energji elektrike.
Zyra Meteorologjike paralajmëroi se komunitetet rurale mund të izolohen nga erërat e forta, duke krijuar “kushte të afërta me stuhi”, dhe se rrufeja mund të paraqesë një rrezik shtesë. Autoritetet theksuan se kur bien bora dhe akulli, rrugët bëhen shpejt të rrezikshme: distancat e ndalimit mund të rriten dhjetë herë, ndaj ngadalësimi dhe mbajtja e hapësirës së mjaftueshme është thelbësore.
Hekurudha Kombëtare u ka kërkuar udhëtarëve të trenave të kontrollojnë udhëtimet e tyre para se të nisen gjatë periudhave me borë dhe akull.
Burimi: Telegrafi.
