Brighton është ndër disa klube të Ligës Premier që po e ndjekin nga afër sulmuesin e Real Madridit, Gonzalo Garcia, me një mundësi huazimi në janar, nëse klubi spanjoll jep miratimin.
Garcia, 21 vjeç, shkëlqeu së fundmi në Kupën e Botës për Klube, ku realizoi katër gola dhe dha një asistim. Performanca e tij u shpërblye me nënshkrimin e një kontrate afatgjatë me ekipin e parë deri në vitin 2030.
Megjithatë, konkurrenca e fortë në repartin ofensiv të Real Madridit, për shkak të pranisë së emrave si Kylian Mbappe, Rodrygo dhe Brahim Diaz, ka kufizuar minutat e Garcias në fushë. Nga 12 paraqitje në sezon, 11 prej tyre kanë qenë si zëvendësues.
Përveç Brightonit, interes për Garcian kanë shprehur edhe klube të tjera angleze si Leeds United dhe Sunderland. Sulmuesi është një prej yjeve të përfaqësueses U21 të Spanjës dhe sezonin e kaluar ka shënuar 25 gola për ekipin rezervë, Castilla, duke barazuar një rekord historik.
Megjithëse Garcia ka theksuar se ëndrra e tij mbetet të ketë sukses me Real Madridin, burime brenda klubit pranojnë se zhvillimi i tij mund të përfitojë nga më shumë minuta loje në Ligën Premier gjatë këtij dimri.
Real Madridi pritet të shqyrtojë mundësinë e një huazimi në afatin kalimtar të janarit, në varësi të situatës në skuadër. Klubi është i hapur vetëm për një marrëveshje huazimi, jo për transferim të përhershëm.
