Mbretëria e Bashkuar paralajmëroi Rusinë se është gati të reagojë ndaj çdo ndërhyrjeje në territorin e saj, pasi anija spiune ruse Yantar u zbulua pranë ujërave britanike, në veri të Skocisë.
Sekretari britanik i Mbrojtjes, John Healey, deklaroi se Yantar kishte drejtuar laserë ndaj pilotëve të Forcave Ajrore Mbretërore (RAF), që po monitoronin aktivitetin e saj. “Mesazhi im për Rusinë dhe Putinin është ky: Ne ju shohim. Ne e dimë se çfarë po bëni. Dhe nëse Yantar udhëton drejt jugut këtë javë, ne jemi gati”, tha Healey gjatë një fjalimi në Londër.
Zyrtarët britanikë thanë se Yantar është pjesë e marinës ruse dhe është ndërtuar për mbikëqyrje gjatë paqes dhe për sabotim në kohë lufte. Ata shtuan se Mbretëria e Bashkuar dhe aleatët e saj po e ndjekin nga afër lëvizjen e saj dhe janë duke punuar për të penguar operacionet sa herë që i afrohet ujërave territoriale britanike.
“Është pjesë e një flote të krijuar për të kërcënuar infrastrukturën tonë nënujore dhe atë të aleatëve tanë”, shtoi Healey, duke përmendur sulmet ndaj tubacioneve dhe kabllove nën Detin Baltik në fillim të këtij viti.
Ai theksoi se kjo nuk është hera e parë që Yantar ka monitoruar mbrojtjen britanike. Sipas tij, pas një paralajmërimi në vitin e kaluar, anija u tërhoq nga ujërat britanike dhe lundroi drejt Mesdheut. Kur ajo kaloi nëpër Kanalin Anglez në janar, u ndoq nga fregata HMS Somerset, e cila është pjesë e forcave mbrojtëse detare të Britanisë.
Paralajmërimi i Healey vjen ndërsa ai argumenton në favor të rritjes së shpenzimeve për mbrojtjen, në prag të publikimit të buxhetit të ri. Kryeministri Keir Starmer është zotuar për një rritje të ndjeshme të buxhetit ushtarak, përballë kërcënimeve të vazhdueshme nga Rusia, Kina dhe Irani. Ndërkohë, qeveria britanike përballet me vendime të vështira financiare, teksa kërkon të rrisë të ardhurat përmes taksave dhe të ulë shpenzimet për të mbuluar një deficit prej miliarda paundësh.
