Gianluigi Buffon, shefi i delegacionit të Italisë, deklaron se Azzurrët janë në pritje të rikthimit të Federico Chiesas, por thekson se përgatitja e grupit mbetet prioritet para play-offit të Kupës së Botës.
Në një intervistë për Gazzetta dello Sport, Buffon konfirmoi se Italia shpreson që Chiesa të rikthehet në kombëtare. Anësori i Liverpoolit nuk ka luajtur për Azzurrët që nga qershori i vitit 2024, kur skuadra u eliminua në fazën 1/16 të Europianit nga Zvicra.
Chiesa ka refuzuar disa ftesa nën drejtimin e trajnerit Gattuso, i cili përsëriti më herët këtë javë se ish-ylli i Juventusit ka një problem që duhet ta zgjidhë.
“Duhet t’i rikthejmë të gjithë lojtarët më të mirë. Nëse dikush spikat, nuk ka asnjë lloj përjashtimi, edhe sepse na duhen”, tha Buffon. “Ne po e presim Chiesan, ka shumë pak si ai në Evropë, por Rino nuk ka lënë askënd jashtë që meriton të jetë këtu. Grupi ka rëndësi.”
Italia do të përballet me Irlandën e Veriut në gjysmëfinalen e play-offit të Kupës së Botës më 26 mars 2026. Fituesi i kësaj ndeshjeje do të luajë në finale më 30 mars kundër Uellsit ose Bosnjë-Hercegovinës.
