Çmimi i një pakoje me 30 vezë në treg arrin deri në 400 denarë (rreth 6.5 euro). Qytetarët shprehin revoltë, duke vënë në dukje se çmimet janë shumë të larta; paketat me vezë kanë tejkaluar edhe çmimin e një pule të gatshme të pjekur, që shkon deri në 350 denarë. Ata presin nga qeveria ndërhyrje dhe thonë se çmimet kanë tejkaluar edhe nivelin në Bashkimin Evropian.
Ministria e Ekonomisë njofton se po monitoron çmimet në treg dhe se Inspektorati i Tregut është në terren për të mbrojtur interesat e konsumatorëve.
Sipas Ministrisë, çmimet monitorohen vazhdimisht përmes Inspektoratit dhe reagohen kur është e nevojshme. Ajo sqaron se çmimi i vezëve varet kryesisht nga produktet e tregut global, si soja për ushqimin e pulave, dhe për këtë arsye është i ndikuar nga luhatjet në treg. Institucionet, thonë nga Ministria, mbeten të përkushtuara për të kontrolluar dhe monitoruar çmimet dhe për të mbrojtur konsumatorët.
Sipas të dhënave të tregut, më parë çmimet e vezëve kanë qenë ndërmjet 200 dhe 300 denarëve. Vetëm në një periudhë prej tre ditësh, çmimi për paketë u rrit nga 350 në 400 denarë, që korrespondon në një çmim rreth 13,3 denarë për vezë.
