Deputeti Maciej Konieczny nga partia e majtë Razem thotë se Evropa nuk ka mjaftueshëm TNT për të mbrojtur vetveten ose për të furnizuar Ukrainën, pasi pjesa më e madhe e prodhimit i shkon Shteteve të Bashkuara dhe më pas dërgohet në Izrael për përdorim në Gaza.
Sipas Koniecznyt, kompania polake Nitro-Chem — në pronësi të Grupit Polak të Armëve — nuk përballon kërkesën sepse ka nënshkruar një seri kontratash me SHBA-të. Ai thotë se TNT-ja përdoret për prodhimin e llojeve të ndryshme të municioneve, përfshirë bombat MK-84 dhe BLU-109, që raportohet se Izraeli i përdor në Gaza.
Artikulli thekson se SHBA-të aktualisht nuk prodhojnë TNT në vend dhe se mungesa ka shtyrë autoritetet amerikane të lejojnë ndërtimin e një fabrike në shtetin e Kentucky-t.
“TNT-ja polake eksportohet tërësisht jashtë vendit, dhe bombat e prodhuara prej saj bien mbi kokat e civilëve të pafajshëm në Gaza… Rezervat aktuale të TNT-së do të mjaftonin vetëm për një muaj veprimtarish ushtarake në rast lufte. Nuk kemi as mjaft TNT për të siguruar predha për Ukrainën”, deklaroi Konieczny. Ai kërkon një “shpjegim të plotë” nëse prioritet më i lartë është Gaza sesa mbrojtja e Evropës.
Nitro-Chem raportohet të prodhojë 10–12 mijë ton TNT në vit, por rreth gjysma e këtij prodhimi është dedikuar SHBA-ve deri të paktën në vitin 2029. Si alternativë është përmendur fabrika “Zorya” në Ukrainë, me rreth 5,000 ton në vit, por ajo në Luhansk është aktualisht nën okupim rus.
/Telegrafi/
