Elon Musk është filmuar në një banket zyrtar në nder të Princit të Kurorës së Arabisë Saudite, Mohammed bin Salman, duke bërë një pyetje të pazakontë që ka tërhequr vëmendjen e mediave ndërkombëtare.
Gjatë ngjarjes, e cila u zhvillua të martën, Musk piu një gllënjkë nga gota e tij dhe iu drejtua Drejtorit Ekzekutiv të Pfizer, Albert Bourla, me pyetjen: “Cili është mendimi juaj, a është ai terrorist?”. Sipas lexueses së buzëve Nicola Hickling, e cila analizoi videon për Daily Mail, Bourla u duk i habitur nga pyetja.
Media britanike Daily Mail e cilësoi deklaratën e Musk si “një lojë me zjarrin”.
Princi Mohammed bin Salman po vizitonte Shtëpinë e Bardhë për herë të parë pas shtatë vitesh, vizitë që vjen pas vrasjes së gazetarit të Washington Post, Jamal Khashoggi, në vitin 2018. Ai u prit me një darkë zyrtare të mbajtur nga Donald Trump dhe bashkëshortja e tij, Melania Trump.
Mes të ftuarve ishin figura të njohura si Cristiano Ronaldo, senatori Marco Rubio, Kryetari i Dhomës së Përfaqësuesve Mike Johnson dhe gazetarët Bret Baier e Maria Bartiromo nga Fox News. Nga bota e biznesit morën pjesë drejtues si Jensen Huang i Nvidia, Tim Cook i Apple, Charles Schwab, Mary Barra e General Motors dhe Alex Karp i Palantir.
Marrëdhëniet mes Shteteve të Bashkuara dhe Arabisë Saudite u tensionuan pas vrasjes së Khashoggit, një kritik i rreptë i regjimit saudit. Trump u pyet për këtë gjatë një konferencë për media në Zyrën Ovale, ku tha: “Po përmendni dikë që ishte jashtëzakonisht i diskutueshëm. Shumë njerëzve nuk u pëlqeu ai zotëri për të cilin po flisni. Pavarësisht nëse ju pëlqen apo jo, gjëra ndodhin. Por ai [Princi Salman] nuk dinte asgjë për këtë.”
Jamal Khashoggi, që jetonte në Virxhinia dhe punonte si kolumnist për Washington Post, u thirr në konsullatën saudite në Stamboll, ku u vra nga 15 agjentë. Trupi i tij nuk është gjetur ende. Princi i Kurorës ka mohuar çdo përfshirje në vrasje, por inteligjenca amerikane beson se ai ka gjasa të ketë dhënë urdhrin për operacionin.
