Flasterët për poshtë syve po fitojnë popullaritet si një hap i shpejtë dhe efektiv në rutinën e kujdesit për lëkurën. Ndërsa trendi i minimalizmit në produktet kozmetike vazhdon, ky produkt rikthehet në qendër të vëmendjes për efektet e tij të drejtpërdrejta në zonën përreth syve.
Ky lloj produkti ka ekzistuar prej kohësh, por ka marrë hov të ri pjesërisht pas promovimit nga figura publike si Hailey Bieber, dhe për shkak të marketingut që thekson rezultatet e shpejta. Përfitimet e tyre reale shkojnë paralel me një aspekt vizual të rëndësishëm: janë shumë “Instagram-friendly”, duke i bërë tërheqës për përdoruesit dhe për tregun e bukurisë.
Si funksionojnë dhe për çfarë shërbejnë? Flasterët për poshtë syve synojnë kryesisht uljen e fryrjes dhe zbehjen e errësirës së rrathëve, duke dhënë një pamje më të freskët dhe lëmuar në një kohë të shkurtër. Për këtë arsye, shumë personazhe të njohur i përdorin para paraqitjeve publike, përfshirë evente si tapeti i kuq. Ato janë të rehatshme, të thjeshta për t’u aplikuar dhe shpesh japin ndjesi luksi edhe në ditët e ngarkuara.
Formulat ndryshojnë, por disa përbërës të përmendur më shpesh janë: acidi hialuronik (hidraton intensivisht dhe mbush vijat e imta), peptidet (nxisin prodhimin e kolagjenit dhe japin efekt lifting), niacinamidi (unifikon tonin), vitamina C (sjell freski) dhe kafeina (ul fryrjen dhe stimulon qarkullimin). Për qetësimin e zonës së ndjeshme rekomandohen formulat që përmbajnë aloe vera, çaj të gjelbër ose kamomil.
A janë një trend i përkohshëm apo pjesë e rutinës? Edhe pse aktualisht janë në kulmin e vëmendjes, flasterët për poshtë syve mund të shërbejnë si zgjidhje e menjëhershme para ngjarjeve të rëndësishme, por edhe si një produkt i dobishëm në rutinën e rregullt të kujdesit për lëkurën, në varësi të nevojave të çdo personi.
Burimi: Telegrafi
