Fondi Monetar Ndërkombëtar (FMN) kritikon konceptin e “paqes fiskale” në deklaratën e saj për Shqipërinë dhe vlerëson se sfida kryesore për të ardhmen do të jetë demografia.
Sipas FMN, Shqipëria regjistron një nga normat më të larta të rritjes ekonomike në Evropë, me inflacion të ulët, borxh publik në rënie dhe rezerva të forta valutore. E mbështetur në këto baza, vendi ndodhet në një moment vendimtar, ndërsa qeveria po zbaton një agjendë reformash me synimin e anëtarësimit në Bashkimin Evropian deri në vitin 2030.
Megjithatë, FMN vëren se pas rritjes që kryesisht buron nga turizmi fshihen sfida të shumta dhe rreziqet e jashtme janë shtuar. Një tkurrje e shpejtë e popullsisë në moshë pune mund të thellojë mungesën e fuqisë punëtore, të nxisë presione inflacioniste, të kërkojë një politikë monetare më të shtrënguar dhe të dobësojë perspektivën e rritjes. Prirjet demografike pritet gjithashtu të rrisin ndjeshëm shpenzimet për pensione dhe shërbime shëndetësore.
FMN përsërit qëndrimin e saj kundër “paqes fiskale”, duke vënë në dukje se përmes saj fshihen gjoba me vlerë rreth 1 miliard euro, çka rrezikon besimin në sistemin e auditimit dhe zhbën progresin e arritur në modernizimin e administratës tatimore.
Po ashtu, FMN bën thirrje për kujdes ndaj rritjes së kredisë për pasuri të paluajtshme dhe rekomandon monitorim të kujdesshëm për të vlerësuar ndikimin e saj në rrezikun sistemik.
