Gjenerali Wesley Clark deklaroi se gabimet e tjerëve nuk duhet t’i atribuohen Hashim Thaçit, duke theksuar se Thaçi nuk kishte kontroll mbi individët që kryenin akte dhune. Clark sqaroi se nuk është e qartë nëse dhuna ishte kryer nga UÇK-ja dhe, edhe nëse po, ajo zhvoillej nga individë të caktuar.
“Unë nuk mendoj se zoti Thaçi ka pasur kontroll mbi njerëz që kanë bërë akte të tilla. Së pari, nuk është e qartë që dhuna ishte kryer nga UÇK-ja. Edhe po të ishte kështu, ajo është realizuar nga individë të caktuar”, deklaroi Clark.
Gjenerali shtoi se edhe nëse UÇK-ja ishte e përfshirë, askush nuk kishte një mekanizëm të kontrollit mbi ngjarjet në terren. Ai përmendi bisedat me Mike Jackson lidhur me kontaktet që komandantët kishin me personat e UÇK-së në zona të caktuara.
Clark ndau një rast ku pilotët e NATO-s sulmuan një rresht traktorësh në Drenicë, të cilët mendonin se ishin serbë duke sulmuar shqiptarë. Piloti më vonë kuptoi se kishte sulmuar njerëz të thjeshtë.
Në përfundim, Clark kujtoi se kishte hasur një person që pretendonte të ishte në një prej traktorëve dhe që përshkroi se si njerëzit digjnin pronat e tyre për t’i shpëtuar nga serbët. Ky moment ilustroi ndjenjat e forta, frikën dhe vendosmërinë e individëve në atë kohë.
Me këtë përfundoi pyetjen mbrojtja e Thaçit, duke vazhduar më pas me atë të Kadri Veselit, përfaqësuar nga avokati Rodney Dixon.
