Kombëtarja e Kosovës po përgatitet për një moment historik: ndeshjet e ‘play-off’-it drejt kualifikimit në Kupën e Botës 2026. Katër kombëtare janë në listën e mundshme të kundërshtarëve: Polonia, Çekia, Sllovakia dhe Uellsi.
Secila prej këtyre përfaqësueseve sjell karakteristika të ndryshme, nga përvoja ndërkombëtare te stili i lojës dhe suksesi historik, gjë që e bën të rëndësishme njohjen e tyre para përballjeve të mundshme.
**Polonia – përfaqësuese me traditë dhe suksese ndërkombëtare**
Polonia është një nga skuadrat më të njohura në Evropë, me kulmet e saj në vitet ’70 dhe ’80. Ajo mbetet një kundërshtar potencialisht i rrezikshëm.
Arritjet kryesore:
– Vendi i tretë në Kupën e Botës: 1974 dhe 1982
– Kampione olimpike: 1972
– Nënkampione olimpike: 1976
Polonia ka prodhuar lojtarë të nivelit botëror, si Robert Lewandowski. Kosova nuk është përballur me të në nivelin e seniorëve, por kanë ekzistuar takime në grupmoshat U21 dhe në futbollin e femrave.
**Çekia – kundërshtari më i njohur për Kosovën**
Çekia është kombëtarja e vetme nga kjo listë që ka zhvilluar ndeshje zyrtare me Kosovën. Në kualifikimet për Euro 2020, të dyja skuadrat ndanë nga një fitore.
Ndeshjet e zhvilluara:
– Kosovë 2-1 Çeki (2019)
– Çeki 2-1 Kosovë (2019)
Arritjet kryesore:
– Nënkampione e Evropës: Euro 1996
– Gjysmëfinaliste: Euro 2004
– Si Çekosllovaki: Kampione e Evropës në 1976; Nënkampione e Botës në 1934 dhe 1938
**Sllovakia – skuadër e disiplinuar dhe e ndërtuar mbi një sistem të fortë**
Sllovakia është një përfaqësuese relativisht e re, por e njohur për organizimin e saj dhe disiplinën taktike.
Arritjet kryesore:
– 1/8 e finales në Kupën e Botës 2010, ku eliminoi Italinë me fitore 3-2
– Pjesëmarrëse në Euro 2016 dhe Euro 2020
Kosova nuk është përballur me Sllovakinë në nivelin senior. Ndeshjet kanë ndodhur vetëm në nivele të moshave dhe në sporte të tjera.
**Uellsi – përfaqësuesja me ngritje të madhe në dekadën e fundit**
Uellsi ka përjetuar një rritje të ndjeshme, veçanërisht pas sukseseve të viteve të fundit.
Arritjet kryesore:
– Gjysmëfinale në Euro 2016
– Pjesëmarrëse në Kupën e Botës 2022 (për herë të parë pas 64 vitesh)
– Çerekfinale në Kupën e Botës 1958
As Kosova, as Uellsi nuk kanë zhvilluar ndeshje me njëra-tjetrën në nivelin A të përfaqësueses së meshkujve. Përballje kanë ndodhur vetëm në nivelet e femrave dhe kategoritë e reja.
**Çfarë i bën këta kundërshtarë sfidues për Kosovën?**
Të gjitha këto kombëtare kanë përvojë të konsiderueshme ndërkombëtare, me pjesëmarrje në Kampionate Botërore dhe Evropiane. Ato përfaqësojnë shkolla të konsoliduara futbolli dhe kanë sisteme zhvillimi të qëndrueshme për talentet. Lojtarët që përfaqësojnë këto vende janë të nivelit të lartë, si Robert Lewandowski, Patrik Schick, Milan Skriniar dhe emrat e rinj premtues nga përfaqësuesja e Uellsit.
/Telegrafi/
