Kombëtarja e Kosovës barazoi 1-1 ndaj Zvicrës në ndeshjen e fundit të ciklit kualifikues për Kupën e Botës 2026. Takimi u zhvillua në stadiumin “Fadil Vokrri” në Prishtinë.
Gjatë ndeshjes, futbollisti shqiptar i Zvicrës, Granit Xhaka, u vërshëllye nga një pjesë e tifozëve në çdo prekje të topit. Pas përfundimit të ndeshjes, Xhaka shprehu habinë e tij për këtë reagim.
“Jam i befasuar që jam fishkëllyer. Dhemb, por më duhet ta pranoj. Mundohem të përqendrohem vetëm në futboll. Për fat të keq, është pjesë e lojës,” tha ai.
Xhaka theksoi se gjithmonë ka pasur mbështetjen e tifozëve zviceranë, si në ndeshjet në shtëpi ashtu edhe në ato si mysafir.
“Të gjithë që ishin këtu mund të jenë krenarë. Nuk është diçka që mund ta marrësh të mirëqenë. Jemi kualifikuar për ngjarje të mëdha për herë të tetë radhazi. Ishte e rëndësishme për ne që kosovarët nuk e morën me vete euforinë,” shtoi ai.
Sipas Xhakës, Zvicra ishte dominuese në pjesën e parë të lojës dhe deri në momentin e shënimit të golit, por Kosova arriti të rikthehej.
“Mentalisht ishte ende e rrezikshme, duke ditur që nuk lejohet të pranosh gjashtë gola. Në përgjithësi, kishim një kampanjë të mirë,” përfundoi ai.
