Kryetari i Komunës së Prishtinës, Përparim Rama, u paraqit para punëtorëve të Trafikut Urban, të cilët protestojnë për shkak të mosrealizimit të pagesave tash e disa muaj.
Rama akuzoi Qeverinë në detyrë të Kosovës, të udhëhequr nga Albin Kurti, dhe ministrin e Financave, Hekuran Murati, se kanë bllokuar buxhetin e Komunës së Prishtinës. Sipas tij, kjo bllokadë ka shkaktuar krizë në nivele të ndryshme administrative të kryeqytetit.
Ai shprehu keqardhje për punëtorët e papaguar dhe vlerësoi se situata është e pabarabartë: paratë e komunës, të cilat sipas tij janë të gatshme, nuk po lëshohen për të kryer detyrimet ndaj punëtorëve. Rama bëri paralelizmin se është e njëjta situatë si kur dikujt i mbahet rroga në bankë dhe zyrtari nuk e lëshon, duke e vendosur përgjegjësinë te qeveria.
(Burim: Telegrafi)
