Presidenti i Barcelonës, Joan Laporta, ka dhënë shpjegimin më të detajuar deri tani për muajt trazues që çuan në shkarkimin e Xavi Hernandezit një vit më parë. Në një intervistë për Esport3, Laporta përshkroi kundërthëniet, mesazhet e përziera dhe dilemat që e bindën se duhej bërë ndryshim në stol.
Sipas tij, Xavi kishte njoftuar publikisht në janar 2024 se do të largohej në fund të sezonit, por disa javë më vonë ndryshoi vendimin pas një takimi privat në shtëpinë e presidentit. Laporta thotë se në atë bisedë i bëri vetëm një pyetje: ‘Xavi, a beson te skuadra?’ dhe trajneri i përgjigjej: ‘Besoj 100 për qind dhe do t’i bëj këta lojtarë kampionë.’
Megjithatë, sipas Laportës, ajo bindje u zhduk brenda pak ditësh, kur Xavi doli para mediave dhe deklaroi se skuadra do t’i duhej dy vjet për të qenë konkurruese. ‘Dy javë më vonë e dëgjova në konferencë duke thënë se ai dhe skuadra do të kishin nevojë për dy vite për të qenë kompetitivë. Mendova: “Çfarë po ndodh këtu?”‘ – tha Laporta.
Dyshimet u thelluan më tej kur Xavi bisedoi me drejtorin sportiv Deco për ndryshime të mëdha në përbërjen e ekipit. Laporta pranon se ato biseda e goditën rëndë dhe ndikuan në vendimin për ndryshim stoli.
Presidenti kujtoi gjithashtu se klubi ka marrë vendime të vështira edhe më parë, duke përmendur rastet me emra si Messi, Alba, Busquets, Piqué, madje edhe Xavi dhe Koeman, dhe theksoi se te Barça institucioni është mbi gjithçka: mbi lojtarët, presidentët dhe trajnerët.
Burimi: Telegrafi.
