Udhëheqësi venezuelas, Nicolás Maduro, ka deklaruar se është i gatshëm të zhvillojë bisedime ballë për ballë me përfaqësues të administratës së ish-presidentit amerikan, Donald Trump, në një moment kur presioni nga Shtetet e Bashkuara ndaj tij po rritet.
Komentet e Maduros erdhën vetëm disa orë pasi Trump tha se nuk e përjashtonte mundësinë e vendosjes së forcave tokësore në Venezuelë. Administrata e tij e kishte akuzuar Maduros, i cili u rizgjodh në një proces të kontestuar nga shumë vende ndërkombëtare, se drejtonte një kartel të trafikut të drogës.
Maduro ka mohuar këto akuza dhe ka akuzuar në shkëmbim Shtetet e Bashkuara se po kërkojnë të fillojnë një konflikt për të marrë kontrollin mbi rezervat e mëdha të naftës së vendit të tij.
Që nga fillimi i mandatit të dytë të Trump në muajin janar, qeveria amerikane ka intensifikuar përpjekjet kundër Maduros. Ajo ka dyfishuar shpërblimin për informacion që çon në arrestimin e tij në 50 milionë dollarë dhe, në gusht, nisi një operacion anti-drogë, duke synuar anijet që akuzohen për transport droge nga Venezuela drejt SHBA-së.
Sipas të dhënave, më shumë se 80 persona janë vrarë në sulmet amerikane ndaj këtyre anijeve, kryesisht në rajonin e Karaibeve dhe disa në Oqeanin Paqësor. Sekretari amerikan i Luftës, Pete Hegseth, është shprehur se qëllimi i “Operacionit Shtiza Jugore” është eliminimi i të ashtuquajturve “narkoterroristë” nga Hemisfera Perëndimore.
Megjithatë, juristët kanë ngritur shqetësime lidhur me legalitetin e këtyre sulmeve, duke theksuar se SHBA nuk ka paraqitur prova për praninë e drogës në anijet e goditura. Po ashtu, mbetet e paqartë se sa ndikim kanë patur këto ndërhyrje në rrjedhën e tregtisë së drogës, e cila në pjesën më të madhe ndodh nëpërmjet kufirit tokësor mes Meksikës dhe SHBA-së.
Pjesë e operacionit është edhe përfshirja e aeroplanmbajtëses amerikane USS Gerald Ford, lëvizje që ka nxitur spekulime në Venezuelë mbi qëllimin real të misionit, konkretisht largimin e Maduros nga pushteti.
Pyetur për planet e tij ndaj Venezuelës më 3 nëntor nga televizioni amerikan CBS, Trump tha: “Nuk mendoj kështu”, duke iu përgjigjur mundësisë së një lufte me Caracas-in. Megjithatë, në një deklaratë të mëvonshme, ai u shpreh se nuk e përjashtonte vendosjen e trupave amerikane në territorin venezuelas.
Sa i përket mundësisë së një komunikimi të drejtpërdrejtë me Nicolás Maduron, Trump u shpreh: “Ndoshta do të flisja me të, po. Unë flas me të gjithë”.
