Lionel Messi vazhdon të thyejë rekorde në sezonin 2025 të MLS. Inter Miami mposhti FC Cincinnati 4-0 në TQL Stadium dhe, me këtë fitore, u kualifikua për herë të parë në finalen e Konferencës së Lindjes.
Ylli 38-vjeçar shënoi një gol dhe dha tri asistime, duke udhëhequr skuadrën e trajnerit Javier Mascherano. Messi e hapi ndeshjen në minutën e 19-të me një goditje me kokë pas asistimit të Mateo Silvettit, më pas organizoi aksionet që çuan te dy golat e Tadeo Allendes dhe goli i dytë i Silvettit.
Në katër ndeshjet e fazës së play-offit nën drejtimin e Mascheranos, Messi ka shënuar gjashtë gola dhe ka dhënë gjashtë asistime. Në serinë e parë ndaj Nashville SC ai realizoi pesë gola dhe tre asistime. Me këto shifra ai ka kaluar në krye të listës për numrin më të madh të kontributeve (gola + asistime) në një edicion të vetëm të play-offit të MLS Cup.
Messi ka arritur gjithashtu një tjetër moment historik personal: ka 1.300 kontribute në gola në të gjitha garat në 1.135 ndeshje me Barcelonën, Paris Saint-Germainin, Inter Miamin dhe Kombëtaren e Argjentinës.
Në shtatë ndeshjet e fundit ai ka 11 gola dhe 11 asistime, duke kontribuar në të gjitha golat e Inter Miamit përveç tre të tyre gjatë kësaj periudhe; mesatarisht po regjistron një kontribut në gol çdo 28.6 minuta.
Për vitin 2025, shifrat e Messit janë 43 gola dhe 28 asistime në 47 ndeshje në të gjitha garat. Në sezonin e rregullt të MLS ai ka shënuar 29 gola dhe ka dhënë 19 asistime — numra që i sigurojnë edhe “Këpucën e Artë” të ligës.
Tani Messi shkon në kërkim të një rekordi tjetër: më shumë gola në një edicion të vetëm të play-offit të MLS Cup. Rekordin aktual e mban Carlos Ruiz, me tetë gola në sezonin 2002 me LA Galaxy.
