Pas një sezoni të shkëlqyer vitin e kaluar, Mohamed Salah po përballet me një fillim të vështirë sezoni dhe është nën vëzhgim nga mediat ndërkombëtare.
Ai mungoi në ceremoninë e Topit të Artë Afrikan, ku fitues u shpall Achraf Hakimi i Paris Saint-Germain, dhe mungesa e tij shkaktoi kritika nga mediat afrikane.
Në Angli, Salah po kritikohet për performancat nën drejtimin e trajnerit Arne Slot. Nga 16 ndeshje zyrtare këtë sezon (14 si titullar), ai ka shënuar vetëm 5 gola dhe ka dhënë 3 asiste — shifra që konsiderohen të ulëta për një lojtar kyç si ai.
Problemet nuk janë vetëm në statistika, por edhe në ndikimin e tij në strukturën e ekipit. Mediat gjermane, përfshirë ‘Sport Bild’, e kritikojnë për mënyrën se si po ndikon te Florian Wirtz. Sipas raportimeve, Salah po pengon zhvillimin e Wirtzit dhe nuk po favorizon nxjerrjen në pah të lojtarëve të rinj, duke u përqendruar kryesisht te bashkëlojtarët me përvojë.
“Është e habitshme që Salah nuk po ndihmon Wirtzin dhe lojtarët e tjerë të rinj të klubit, të cilët kanë kushtuar mbi 500 milionë euro në total”, shkruan ‘Sport Bild’.
“Ai po bëhet një problem për Liverpoolin dhe për Wirtzin, i cili është shpenzimi më i madh i verës me 140 milionë euro dhe pritet të udhëheqë ekipin në të ardhmen.”
Megjithatë, trajneri Slot dhe klubi vazhdojnë të kenë besim tek Salah dhe shpresojnë që ai të qëndrojë deri pas Kupës së Kombeve të Afrikës. Pas kësaj periudhe, Wirtz pritet të ketë më shumë mundësi të zhvillohet dhe të tregojë potencialin e tij në fushë.
Situata aktuale e Salahut pasqyron sfidat e një lojtari legjendar përballë pritshmërive të larta dhe presionit, ndërsa e ardhmja e tij te Liverpool mbetet temë debati në mediat ndërkombëtare.
/Telegrafi/
