Monterrey ka nisur zyrtarisht bisedimet për rinovimin e kontratës me Sergio Ramos, me synimin ta zgjatë marrëveshjen përtej dhjetorit 2025. Edhe pse ende nuk është arritur një marrëveshje përfundimtare, ekziston interes i ndërsjellë midis palëve, ndërsa Rayados po kalon një fazë vendimtare të sezonit të Apertura.
Klubi e konsideron udhëheqjen dhe përvojën e Ramosit thelbësore për arritjen e objektivave në vitin 2026, çka e bën rinovimin një prioritet. Sipas ESPN, negociatat janë në fazë paraprake, por të dyja palët shfaqin vullnet për të vazhduar bashkëpunimin.
Që nga bashkimi me ekipin në shkurt të vitit 2025, Ramos është bërë shtylla kryesore e mbrojtjes së Monterreyt dhe njihet si një nga përforcimet më të spikatura të ligës. Ndikimi i tij brenda dhe jashtë fushës ka ndryshuar kulturën e ekipit, ndaj rinovimi shihet si një vendim strategjik për të ardhmen e klubit.
Presidenti i klubit, Jose Antonio Noriega, konfirmoi se po vazhdojnë bisedimet: “Sigurisht që ka biseda dhe kjo është normale, por preferoj të mos hyj në detaje, sepse mund të na shpërqendrojë nga ajo që është më e rëndësishme tani: ekipi.”
/Telegrafi/
