Azilkërkuesit në qendrën më të madhe të pritjes në Britani janë filmuar duke festuar dhe duke u përfshirë në një përleshje. Sipas mediave britanike, pamjet tregojnë një grup burrash duke kërcyer dhe kënduar në një zonë rekreative brenda ish-bazës RAF Wethersfield në Essex, ku strehohen rreth 1,200 migrantë të ardhur me varka të vogla.
Në një prej videove, disa burra shfaqen duke kërcyer në një hapësirë të pajisur me drita diskoteke dhe sistem zërimi. Në sfond, një roje sigurie duket se i filmon, ndërsa të tjerë luajnë bilardo.
Një tjetër video tregon një përleshje mes disa personave në një zonë të përbashkët, ku shihen duke goditur njëri-tjetrin me tabaka, ndërsa stafi i sigurisë përpiqet të ndërhyjë.
Pamjet janë publikuar së fundmi, ndonëse besohet se janë filmuar para ardhjes në pushtet të Partisë Laburiste në korrik të vitit të kaluar. Sipas burimeve nga Ministria e Brendshme, videot janë bërë përpara zgjedhjeve të përgjithshme.
Publikimi i pamjeve vjen një ditë pas njoftimit të Sekretares së Brendshme, Shabana Mahmood, për masa më të rrepta ndaj sistemit të azilit.
Banorët lokalë në fshatin Wethersfield kanë kundërshtuar që nga fillimi shndërrimin e ish-bazës RAF në një qendër pritjeje për azilkërkuesit dhe janë kundër zgjerimit të saj.
Gjatë fushatës zgjedhore, kryeministri aktual Sir Keir Starmer kishte premtuar mbylljen e objektit dhe ndalimin e përdorimit të bazave ushtarake për strehimin e migrantëve. Megjithatë, në korrik të këtij viti, u njoftua zgjerimi i kapaciteteve të qendrës me 445 vende të reja.
