Raporte të kundërta raportohen rreth autorësisë së planit me 28 pika për t’i dhënë fund luftës në Ukrainë, i cili po perceptohet si i favorshëm për Rusinë pasi mbështet disa nga qëndrimet kryesore të Moskës, shkruan The Guardian.
Një grup senatorësh amerikanë thonë se Marco Rubio u ka thënë atyre se plani nuk është një propozim amerikan dhe nuk pasqyron qëndrimin zyrtar të Uashingtonit. Këto pretendime janë kundërshtuar nga Departamenti i Shtetit i SHBA-së.
Senatorët pretendojnë gjithashtu se “Sekretari i Shtetit” u ka thënë atyre se bëhet fjalë për një plan rus, i zbuluar nga një përfaqësues i Moskës, dhe se SHBA-të kishin rënë dakord ta kalonin atë në Ukrainë për shqyrtim dhe përgjigje.
Senatori republikan Mike Rounds, anëtar i komitetit të inteligjencës së Senatit, u citua të ketë thënë: “Sekretari Rubio na telefonoi këtë pasdite. Mendoj se na e bëri shumë të qartë se ne jemi marrësit e një propozimi që iu dorëzua njërit prej përfaqësuesve tanë. Nuk është rekomandimi ynë, nuk është plani ynë i paqes. Është një propozim që u pranua. Si ndërmjetës, ne kemi bërë rregullime për ta ndarë atë. Dhe nuk e publikuam.”
Senatori i pavarur i Maine, Angus King, tha se Rubio u ishte shprehur se plani “nuk ishte plani i administratës”, por më shumë i ngjashëm me një “listë dëshirash të rusëve”.
Pas këtyre komenteve, Rubio u përgjigj duke thënë: “Propozimi i paqes u hartua nga SHBA-të. Ai ofrohet si një kornizë e fortë për negociatat e vazhdueshme. Ai bazohet në kontributin nga pala ruse. Por ai bazohet gjithashtu në kontributin e mëparshëm dhe të vazhdueshëm nga Ukraina.”
Kryeministri polak Donald Tusk, një aleat i vendosur i Ukrainës, tha në X se “do të ishte mirë të dihej me siguri se kush është autori i planit dhe ku është krijuar” para se të fillojë diskutimi i dispozitave të tij.
Burimi: The Guardian; përshtatur nga Telegrafi.
