Rafineria e naftës në Ryazan, në pronësi të kompanisë ruse Rosneft dhe që furnizon me karburant rajonin e Moskës, ka ndërprerë sërish përpunimin e naftës së papërpunuar pas një sulmi me dron nga Ukraina më 15 nëntor.
Rafineria, më e madhja në pronësi të Rosneft-it, vitin e kaluar përpunoi 13,1 milionë tonë naftë bruto, që përbën rreth 5 për qind të kapacitetit të përgjithshëm të përpunimit në Rusi. Sipas “Moscow Times”, impianti pritet të mbetet jashtë funksionit të paktën deri në fund të muajit.
Sulmi i fundit ka shkaktuar zjarr dhe ka dëmtuar njësinë kryesore të përpunimit, e cila mbulon 48 për qind të kapacitetit total të rafinerisë, rreth 8 milionë tonë në vit.
Edhe më 23 tetor 2025, rafineria ndaloi pjesërisht punën pas një tjetër sulmi me dron, që dëmtoi njësinë AVT-4 dhe disa njësi të tjera përreth, duke reduktuar kapacitetin me rreth 25 për qind.
Aktualisht, impianti është plotësisht i paralizuar dhe të gjitha njësitë janë mbyllur.
Rafineria kishte pezulluar operacionet në disa periudha edhe gjatë gushtit dhe shtatorit, si pasojë e sulmeve të mëparshme. Vitin e kaluar, uzina prodhoi 2,3 milionë tonë benzinë, 3,4 milionë tonë naftë dhe 4,2 milionë tonë vaj djegës.
