Kapiteni i Kombëtares së Zvicrës, Granit Xhaka, u përball me fishkëllima nga një pjesë e tifozëve gjatë ndeshjes Kosovë – Zvicër në Prishtinë. Ky moment krijoi një atmosferë tensioni dhe u komentua gjerësisht pas përfundimit të takimit.
Xhaka, i cili ka prejardhje nga Kosova, u shpreh i prekur nga reagimi i tifozëve, duke e cilësuar situatën si të dhimbshme. Ai theksoi se e përjetoi rëndë faktin që një ndjesi e tillë i ndodhi pikërisht në vendin e origjinës së tij, pavarësisht se përfaqëson Zvicrën në arenën ndërkombëtare dhe ka treguar gjithmonë krenari për rrënjët e tij shqiptare.
Pas ndeshjes, Xhaka reagoi në rrjetet sociale duke postuar një fotografi të shoqëruar me këngën e Çun Mulës “Malësori” dhe mbishkrimin “FALEMINDERIT”. Në sfond dëgjoheshin vargjet: “Si zog shqipe n’mal mi male, e kish falë zoti këtë djal…”, që u interpretuan si një shenjë mirënjohjeje dhe lidhjeje të thellë emocionale me vendin e origjinës.
Ngjarja ka nxitur reagime të shumta në opinionin publik dhe sportiv, me thirrje për më shumë respekt ndaj futbollistëve me prejardhje shqiptare që përfaqësojnë shtete të tjera në kompeticione ndërkombëtare.
