Gjatë Asamblesë së Përgjithshme të rregullt të bordit të drejtorëve, Real Madrid publikoi një video përkujtimore në të cilën përfshiu gabimisht foton e lojtarit të Elche, Andre da Silva, në vend të fotografisë së André Silva, vëllait të futbollistit të Liverpoolit Diogo Jota. Gabimi u vu re menjëherë dhe shkaktoi reagime të menjëhershme.
Klubi kërkoi falje publike për ngjarjen përmes një njoftimi në platformën X. Në njoftimin zyrtar thuhej: “Real Madrid CF i kërkon falje Elches dhe lojtarit të tyre Andre da Silva për përfshirjen gabimisht të fotografisë së tij në nekrologjinë e videos emocionale, në vend të fotografisë së André Silva, vëllait të Diogo Jotas. Na vjen keq për atë që ndodhi.”
Diogo Jota, 28 vjeç, dhe vëllai i tij André, 25 vjeç, humbën jetën më 3 korrik në një aksident automobilistik në kilometrin e 65-të të autostradës A-52, në zonën e Zamorës, drejt Benaventes. Ngjarja tronditi futbollin portugez dhe atë evropian.
Real Madrid kishte shprehur më herët ngushëllimet dhe bëri homazhe për Diogo Jotën gjatë një ndeshjeje të Ligës së Kampionëve kundër Liverpoolit. Sipas raportimeve, Xabi Alonso, Trent Alexander-Arnold dhe Emilio Butragueño vendosën lule pranë një memoriali të improvizuar pranë “Anfield”.
Ndeshja mes Elches dhe Real Madridit pritet të zhvillohet sonte, me fillim nga ora 21:00.
Telegrafi
