Presidenti i Real Madridit, Florentino Perez, ka paraqitur një plan për të forcuar të ardhmen financiare të klubit duke krijuar një entitet të ri komercial dhe duke synuar shitjen e rreth 10 për qind të tij. Kjo iniciativë vjen pas sigurimit të 360 milionë eurove nga fitimet e lidhura me stadiumin Santiago Bernabeu.
Sipas të përditshmes “El Periodico”, ky është një nga ndryshimet më të mëdha korporative në historinë moderne të klubit, me qëllim sigurimin e investimeve të reja pa e kthyer Real Madridin në një shoqëri aksionare.
Perez e paraqiti këtë plan përpara anëtarëve të klubit, duke theksuar nevojën për të mbrojtur institucionin dhe për të modernizuar strukturën e tij, pa e cënuar modelin tradicional të pronësisë nga anëtarët.
“Klubi ynë duhet të ketë një strukturë organizative që na mbron si institucion dhe gjithashtu na mbron të gjithëve ne si pronarë të Real Madridit”, tha Perez. Ai shtoi se synohet një riorganizim korporativ që do të garantojë të ardhmen financiare të klubit dhe do të ruajë të drejtën e pronësisë nga anëtarët.
Ky model pritet të shmangë transformimin e Real Madridit në një shoqëri sportive aksionare, duke ruajtur kontrollin e anëtarëve mbi vendimmarrjen dhe asetet financiare të klubit.
