Real Madridi po shqyrton një ndryshim të modelit të pronësisë, ndërsa dy investitorë të mëdhenj — Sixth Street dhe Bernard Arnault — janë të gatshëm të blejnë rreth 10% të klubit për përafërsisht 1 miliard euro.
Sipas “Vazpopuli”, të dy grupet po monitorojnë zhvillimet, në një kohë kur presidenti Florentino Perez po përshpejton planin për të hapur klubin ndaj investimeve të jashtme për herë të parë. Vlerësimi aktual i Real Madridit raportohet se ka kaluar 10 miliardë euro.
Një mbledhje e jashtëzakonshme e anëtarëve pritet të mbahet në mesin e dhjetorit për të diskutuar modelin e ri të pronësisë. Projekti synon të përdorë një strukturë të ngjashme me modelet gjermane: futjen e një aksioneri minor me të drejta ekonomike në afat të mesëm, por pa fuqi vendimmarrëse. Kjo strategji ka për qëllim uljen e rezistencës së sociosve përpara një referendumi të planifikuar në vitin 2026.
Sixth Street tashmë bashkëpunon me Real Madridin në operacionet komerciale të “Santiago Bernabeu”, ndërsa LVMH, kompania e Bernard Arnault, u bë së fundmi furnizues zyrtar i klubit. Për të dy investitorët, blerja e një pakete të vogël aksionesh shihet si një mënyrë me rrezik të ulët për të forcuar lidhjet me klubin.
Nëse projekti miratohet, Real Madridi do të hapë një epokë të re financiare, duke ruajtur kontrollin sportiv dhe institucional, por duke siguruar burime shtesë për rritje dhe modernizim.
Telegrafi
