Vetëm dhjetë vite më parë Schalke 04 ishte ndër katër skuadrat më të mira të Ligës së Kampionëve, me futbollistë si Manuel Neuer dhe emra të tjerë të spikatur. Sot, klubi i Gelsenkirchen ndodhet në kategorinë e dytë të futbollit gjerman, Bundesliga 2, pas një periudhe të vështirë.
Në pesë sezonet e fundit, Schalke ka luajtur katër sezone në divizionin e dytë. Dy prej këtyre sezonëve u mbyllën larg zonave të larta të tabelës — në vendin e 10-të dhe të 14-të — çka ndikoi në uljen e moralit të tifozëve. Megjithatë, fillimi i sezonit aktual është pozitiv: pas katër muajsh skuadra ndodhet në vendin e dytë të klasifikimit, duke rikthyer shpresën për një rikthim në elitë.
Në vitet e fundit, Schalke luftonte për kualifikime në garat evropiane dhe ka prodhuar emra të rëndësishëm të futbollit gjerman. Pjesëmarrjet e fundit kontinentale ishin në sezonin 2016/17 — eliminim në çerekfinale të Ligës së Evropës nga Ajax — dhe në 2018/19, kur u mposht nga Manchester City në 1/8 e Ligës së Kampionëve.
Pika më e lartë e historisë së fundit të klubit ishte viti 2011: midis prillit dhe korrikut Schalke arriti gjysmëfinalen historike të Ligës së Kampionëve (u eleminua nga Manchester United), fitoi Kupën e Gjermanisë dhe Superkupën e Gjermanisë ndaj Borussia Dortmund. Në atë kohë skuadra përbëhej nga lojtarë si Manuel Neuer, Joel Matip, Raul dhe talenti në rritje Julian Draxler.
Gjatë viteve, klubi ka shitur edhe futbollistë të tjerë të shquar si Leroy Sané, Weston McKennie dhe Thilo Kehrer, të transferuar në klube të mëdha evropiane për shuma të konsiderueshme.
Për rikthimin në Bundesliga, Schalke mbështetet në një përzierje të të rinjve premtues dhe lojtarëve me përvojë. Në skuadër veçohen portieri Loris Karius, Amin Younes dhe Emil Hojlund, si dhe sulmuesi malian Moussa Sylla dhe mesfushori turk Kenan Karaman, që deri tani janë kryegolashënuesit e klubit.
Trajneri Miron Muslic tha: “Kjo mund të jetë periudha më krenare për mua në pesë muajt e fundit. Jemi të lumtur për paraqitjet dhe fitoret e fundit. Çdo lojtar jep 100% për fanellën dhe për klubin”.
Pas dy rënieve (2020/21 dhe 2022/23) dhe një rikthimi të përkohshëm në elitë, Schalke synon që këtë sezon të rikthehet fuqishëm në Bundesliga.
Burimi: Telegrafi
