Kombëtarja e Kosovës ka pasur një paraqitje të suksesshme në fazën kualifikuese për Kupën e Botës 2026, duke mbyllur Grupin B me tri fitore, dy barazime dhe një humbje. Ky rezultat i siguroi vendin e dytë në grup dhe kualifikimin në fazën ‘play-off’. Një rol kyç në këtë arritje ka pasur përzgjedhësi Franco Foda, i cili solli ndryshime të rëndësishme në formacion dhe strategji, duke mos u mbështetur më plotësisht në disa nga figurat e vjetra të ekipit.
Kosova tashmë po kalon në një fazë të re, ku konkurrenca në skuadër është rritur dhe hierarkia po riformësohet. Në fokus janë të ashtuquajturit ‘senatorë’ – lojtarë me përvojë që kanë qenë bazë e ekipit për vite me radhë. Disa prej tyre mbeten të paprekshëm, ndërsa të tjerët po ndiejnë presionin e gjeneratës së re.
Vedat Muriqi vazhdon të jetë figura kryesore e ekipit. Pavarësisht rrethanave, ai mbetet lojtari i parë në listë për Fodën. Me gola, duele dhe prezencë fizike, Muriqi është lideri i padiskutueshëm dhe simboli i skuadrës.
Në krahun e djathtë, Mërgim Vojvoda shfaq qëndrueshmëri dhe siguri. Ai ka luajtur një rol të rëndësishëm në balancimin e lojës dhe është ndër ata lojtarë që nuk humbet vendin në formacion, pavarësisht ndryshimeve taktike.
Kapiteni Amir Rrahmani vazhdon të ketë një ndikim të madh edhe kur mungon për shkak të lëndimeve. Prania e tij e sjell qetësi dhe organizim në mbrojtje, ndërsa përvoja e tij është një aset i vyer për ekipin.
Ndërkohë, disa emra dikur të rëndësishëm tani po luftojnë për të ruajtur pozitat. Edon Zhegrova, një ndër talentët më të mëdhenj të Kosovës, ka filluar disa ndeshje nga stoli për shkak të konkurrencës së shtuar dhe lëndimeve. Ai mbetet lojtar vendimtar, por jo më i padiskutueshëm.
Milot Rashica, më parë një figurë qendrore në sulm, ka pësuar rënie në formë për shkak të mosaktivizimit të rregullt në klub. Megjithatë, përvoja dhe cilësitë e tij e mbajnë ende në orbitën e grupit të parë.
Valon Berisha, dikur truri i mesfushës, po përballet me ulje të minutave në fushë. Prania e mesfushorëve të rinj si Leon Avdullahu dhe Elvis Rexhbecaj ka ndryshuar përparësitë në qendër të fushës, megjithatë përvoja e Berishës është ende e rëndësishme në ndeshjet me presion të lartë.
Fidan Aliti, për vite të tëra shtylla e mbrojtjes, po ndien pasojat e konkurrencës dhe riformatimit taktike. Megjithatë, ai vazhdon të mbetet alternativë e vlefshme për stabilitetin në prapavijë.
Kosova po ndërton një ekip më të fortë dhe më të thellë, ku disa lojtarë si Muriqi, Vojvoda dhe Rrahmani mbeten të pazëvendësueshëm. Ndërkohë, të tjerë si Zhegrova, Rashica, Berisha dhe Aliti po përpiqen të ruajnë pozitat në një mjedis gjithnjë e më konkurrues.
Arijanet Muric dhe Florent Muslija gjithashtu po shfaqin shenja të pjekurisë dhe pritet të jenë pjesë e brezit të ri të senatorëve për vite në vijim.
