Rritja e çmimeve të vezëve dhe produkteve bazë ushqimore po rëndon gjendjen ekonomike të familjeve në Kosovë. Qytetarët thonë se përballen çdo ditë me çmime të larta, ndërsa të ardhurat nuk rriten, çka vështirëson jetesën.
Sipas të anketuarve, vezët dhe artikujt bazë janë të domosdoshëm për çdo familje, prandaj shtrenjtimi po krijon presion të madh ekonomik. Shumë prej tyre raportojnë rritje çmimesh deri në 30 për qind, ndërsa rrogat dhe pensionet mbeten të pamjaftueshme.
Një banor nga fshati tha se shtrenjtimi ndikon thellë në familje, pasi vezët janë pjesë e përditshme e mëngjesit: ai vuri në dukje se politika ekonomike e viteve të fundit nuk ka funksionuar dhe kërkoi ndryshim urgjent.
Qytetari Tafir Gashi theksoi se rritja e çmimeve, përfshirë vezët, rëndon familjet, por se blerjet janë të domosdoshme: ‘Produktet janë shumë të shtrenjta. Duhet të rriten pagat dhe të ulen çmimet, por ne nuk kemi se çfarë të bëjmë, duhet të blejmë vezë pavarësisht çmimit.’
Sabit Makolli deklaroi se nuk ka vërejtur përmirësim në çmimet e produkteve bazë, por vetëm rritje, deri në 30 për qind. Ai theksoi se kjo prek veçanërisht pensionistët me të ardhura të ulëta.
Avdyl Kuleta pohoi se rritja e çmimeve ndikon dukshëm dhe se qytetarët presin nga qeveria rritje të pagave: ‘Çmimet janë rritur dhe rrogat duhet të rriten.’
Të dhënat zyrtare konfirmojnë rritjen. Sipas Agjencisë së Statistikave të Kosovës (ASK), në mars 2025 nënkategoria ‘qumësht, djathë dhe vezë’ shënoi një rritje prej 7,1 % në krahasim me mars 2024. Buletini Ekonomik raporton se kompleti prej 30 vezëve ka arritur çmimin prej 4,20 euro, ndërsa në disa markete të Prishtinës çmimi arrin në 4,89 euro.
Çmimi i vezëve është ngritur edhe në Maqedoninë e Veriut; sipas raportit, një vezë kushton 0.20 cent.
