Leckat e mikrofibrës janë bërë një mjet i domosdoshëm për pastrimin e shtëpisë, falë aftësisë së tyre për të mbajtur pluhurin, papastërtinë dhe bakteret më mirë se shumica e materialeve të tjera.
Këto lecka kanë një strukturë të veçantë që u lejon të thithin disa herë më shumë lëng se pesha e tyre. Janë ekologjike, të ripërdorshme dhe ekonomike. Një leckë mikrofibre cilësore mund të përballojë deri në 500 larje nëse mirëmbahen siç duhet.
Ato janë të përbëra nga fibra sintetike ultra të holla, kryesisht poliester dhe poliamid, që janë deri në 100 herë më të holla se qimet e njeriut. Brenda një inçi katror gjenden mbi 200.000 fibra mikrofibre, të cilat ndihmojnë në kapjen e grimcave më të imëta të pluhurit. Për shkak të kësaj strukture, janë të buta, të qëndrueshme dhe nuk lënë gjurmë në sipërfaqe të ndjeshme si xhamat, pasqyrat apo ekranet.
Leckat e mikrofibrës mund të përdoren për pastrimin e të gjitha sipërfaqeve në shtëpi – nga mobiliet dhe dyshemetë, te xhamat dhe makina. Janë të përshtatshme për pastrim të thatë dhe të lagësht, si dhe për lustrim.
Për të ruajtur efektivitetin, duhet të lahen pas çdo përdorimi ose të paktën pas çdo tre herë përdorimesh. Nëse nuk pastrohen rregullisht, lagështia dhe bakteret që grumbullohen në fibra mund të shkaktojnë erë të pakëndshme dhe të ulin performancën pastruese.
Gjatë larjes, rekomandohet të ndahen nga rrobat e tjera për të evituar mbledhjen e pushit. Për lecka shumë të ndotura përdorni ujë të ngrohtë, ndërsa për ato më pak të ndotura mjafton ujë i ftohtë. Duhet përdorur një detergjent i butë dhe të shmanget përdorimi i zbutësve, të cilët bllokojnë mikroporet e fibrave dhe ulin aftësinë thithëse.
Për larje me dorë, mbushni një enë me ujë të ftohtë, shtoni disa pika detergjent dhe lini lecka të zhyten për rreth 15 minuta. Më pas fërkojini lehtë, shpëlajini mirë dhe shtrydhni ujin e tepërt. Rekomandohet të mos përdorni ujë të valë, pasi dëmton fibrat.
Pas larjes, leckat duhen tharë në mënyrë natyrale, të shtrira ose të varura, larg rrezeve direkte të diellit. Po ashtu, mund të thahen në tharëse me temperaturë të ulët dhe pa përdorur zbutës. Filtri i pushit duhet pastruar para dhe pas tharjes.
Pasi të jenë tharë plotësisht, palosni dhe ruani lecka në një vend të pastër, të thatë dhe pa lagështi. Nëse leckat bëhen të ashpra, humbin aftësinë thithëse apo nuk heqin erën edhe pas larjes, është koha për t’i zëvendësuar.
Me mirëmbajtjen e duhur, një leckë mikrofibre mund të zgjasë deri në dy vjet dhe të përballojë nga 300 deri në 500 larje.
