Presidentja Gordana Siljanovska Davkova, në një seancë të përbashkët të Këshillit Kombëtar për Integrimin Evropian dhe Komisionit për Çështjet Evropiane, komentoi raportin e fundit të Komisionit Evropian për vendin. Ajo vuri në dukje se ky raport, i 16-ti me radhë, përveç vlerësimit të vendit, reflekton edhe qëndrimin e BE-së ndaj tyre. Sipas Davkovës, nëse do të kishte një garë për gatishmëri politike, vendi do të ishte kampion në zbatimin e kësaj qasje. “Kjo nuk është periudhë për reforma, për fat të keq, pasi kushtet aktuale i ngjajnë një periudhe lufte”, tha ajo. Siljanovska Davkova nënvizoi se për të, si në të shkuarën ashtu edhe tani, BE-ja mbetet një perspektivë për reforma demokratike dhe çon drejt paqes dhe stabilitetit të qëndrueshëm. Integrimi në BE, sipas saj, do t’i japë fund fenomenit të ballkanizimit. Ajo kujtoi deklaratën e ish-komisionerit Olli Rehn, duke theksuar se vendi nuk është problem për kapacitetin absorbues të BE-së. Po ashtu, Davkova theksoi se BE-ja nuk ka pasur një strategji të qartë për Ballkanin, duke u vonuar në veprimet e saj, ndërsa shpesh SHBA-të kanë lëvizur më shpejt. Ajo kritikoi BE-në për përdorimin e standardeve të dyfishta dhe për fokusin e saj në momente dhe data të rëndësishme. “Tani dëgjojmë që ky është momenti kyç dhe duhet të hipim përsëri në tren,” përfundoi ajo.
Vëzhguesi
November 17, 2025
