SPAK njofton se ka vendosur masa sigurie ndaj zv.kryeministres dhe ministres së Infrastrukturës dhe Energjisë, Belinda Balluku, në kuadër të hetimeve për dy tenderë të mëdhenj publikë: Tunelin e Llogarasë dhe Unazën e Jashtme të Tiranës, Loti 4.
Sipas Prokurorisë së Posaçme, gjatë hetimeve të procedimit penal nr. 136 të vitit 2025 janë konstatuar shkelje të barazisë së pjesëmarrësve në tendera, ndërhyrje në procesin e vlerësimit të ofertave dhe paracaktim i fituesve, duke krijuar avantazhe të padrejta për operatorë të caktuar ekonomikë.
SPAK nënvizon se Balluku, në cilësinë e Ministres së Infrastrukturës dhe Energjisë, ka ndjekur dhe orientuar të gjithë procesin e tenderimit — nga faza përgatitore deri te nënshkrimi i kontratës — duke ndërhyrë në mënyrë të paligjshme në procedurën e prokurimit. Ajo akuzohet për bashkëpunim me anëtarë të Komisionit të Vlerësimit të Ofertave dhe me drejtues të institucioneve vartëse, duke paracaktuar fituesit e dy tenderëve.
Fondi limit i procedurave, sipas SPAK:
Tuneli i Llogarasë — 18.9 miliardë lekë pa TVSH.
Unaza e Jashtme e Tiranës, Loti 4 — 2.09 miliardë lekë pa TVSH.
Në të dy procedurat, janë gjetur veprime në kundërshtim të hapur me ligjin për prokurimin publik dhe rregulloret përkatëse.
Me vendim të datës 19 nëntor 2025, Gjykata ka urdhëruar për Belinda Ballukun:
– ndalim të daljes jashtë shtetit;
– pezullim nga detyra si zv.kryeministre dhe ministre;
– masa sigurie për akuzën “Shkelja e barazisë së pjesëmarrësve në tendera apo ankande publike”, kryer në bashkëpunim.
Për zyrtarët e tjerë të përfshirë, SPAK njofton:
– Gentian Gjyli, drejtor në ARRSH — arrest shtëpie;
– Erald Elezi, drejtor në ARRSH — arrest shtëpie.
Të dy akuzohen se kanë krijuar skema favorizimi për operatorë privatë dhe kanë manipuluar procesin e tenderimit, në bashkëpunim me drejtues të tjerë.
Hetimet vazhdojnë dhe po zhvillohen me metoda speciale, përfshirë analiza digjitale dhe veprime të tjera hetimore. SPAK njofton se priten masa të mëtejshme gjatë vijimit të procesit.
