Shërbimi hungarez i Radios Evropa e Lirë, Szabad Europa, ndërpreu aktivitetin pasi administrata e presidentit të SHBA, Donald Trump, njoftoi se nuk do ta financonte më median.
Në deklaratën që njoftonte përfundimin e operacioneve, Szabad Europa tha se kishte “punuar me përkushtim për t’u ofruar lexuesve hungarezë gazetarinë më të mirë dhe informacionin objektiv”. “Ju falënderojmë për besimin, interesin dhe mbështetjen që kemi marrë nga publiku ynë”, shtoi deklarata, dhe bëri të ditur se artikujt e saj do të mbeten ende të disponueshëm online.
Shërbimi hungarez ishte ndërprerë në vitin 1993, por u rilancua në vitin 2020 pasi Agjencia e Shteteve të Bashkuara për Median Globale (USAGM) dhe Kongresi i SHBA-së miratuan rikthimin, si përgjigje ndaj rënies së lirisë së medias në Hungari nën kryeministrin Viktor Orbán.
Mbyllja e Szabad Europa vjen në kohën kur administrata Trump ka bërë shkurtime të mëdha në transmetues ndërkombëtarë si Radio Free Europe/Radio Liberty dhe Zëri i Amerikës, si dhe në transmetues publikë vendas si PBS dhe NPR.
Kari Lake, të cilën Trump e emëroi këshilltare të lartë të USAGM, i njoftoi Kongresin në një letër më parë këtë muaj se agjencia nuk do të financonte më Szabad Europa, duke shkruar se operacionet e saj “nuk ishin në përputhje me interesat kombëtare të SHBA-së” dhe se ato “minonin” politikën e jashtme të administratës Trump.
Në një postim në X, dy ditë më vonë, Lake shkroi: “Globalistët janë më se të mirëpritur të urrejnë aleatin tonë Viktor Orbán. Ata nuk kanë të drejtë të përdorin paratë TUAJA për të destabilizuar regjimin hungarez nëpërmjet programeve të financuara nga taksapaguesit në Szabad Europa. Ne po i japim fund kësaj.”
Telegrafi
